New Delhi, January 6, 2026 – Delhi ke Adarsh Nagar mein maujood Delhi Metro Rail Corporation (DMRC) ke staff quarters mein aaj subah hi ek bhayanak aag lagne ki wjha se ek couple aur unki 10 saal ki beti ki dardnaak maut hui. Yeh aag raat mai lagbhag 2:39 baje lagi thi, jab parivaar apne flat ke andar maujood tha aur so raha tha. Delhi Fire Services ko jaise hi call mili, turant kai fire tenders ko mauke par bheja gaya. Lekin tab tak aag poore flat mein phail chuki thi, jiski wajah se rescue operation kaafi mushkil ho gaya.
Firefighters ne kaafi mehnat krne ke baad aag par kaboo paaya. Jab flat ke andar search operation kiya gaya, toh teen logon ke jale hue shav mile. Marne walon ki pehchaan Ajay Kumar (42), unki patni Neelam (38) aur unki beti Jahnvi (10) ke roop mein hui hai. Adhikaarion ke mutaabik, aag aur dhuein ki wajah se unki mauke par hi maut ho gayi. Bataya ja raha hai ki aag itni tezi se phaili ki parivaar ko bahar nikalkr bhagne ka mauka bhi nahi mil paaya.
Filhaal aag lagne ki exact wajah ka pata nahi chal paaya hai. Shuruati jaankari ke anusaar, yeh aag electrical short circuit ya ghar ke kisi samaan se shuru hui hai. Police aur forensic team ne flat ko seal kar diya hai aur mamle ki jaanch jaari hai. Is ghatna ke baad poore ilaake mein shok aur gham ka mahaul hai, aur yeh haadsa ek baar phir shehar ke residential areas mein fire safety par sawal khade karta hai.
